Gasteizko Udalak eta Vital Fundazioaren ekimena
Gasteizko Udalak eta Vital Fundazioak aurten jasangarritasunaren aldeko konpromisoa zabaldu dute, ‘Plastikorik ez’ kanpaina San Prudentzio jaietara ekarriz. Horrela, apirilaren 28an, Armentiako Administrazio Batzarreko laguntzarekin, 50.000 edalontzi berrerabilgarri jarriak izango dira, 250.000 erabilera bakarreko ontzi ‘kontrolik gabe’ erabiltzeari aurrea hartzeko.
Bi erakundeek adierazi dutenez, proposamen honen helburua ingurumen jasangarritasuna, eraginkortasun operatiboa eta herritarren inplikazioa uztartzea da, inpaktu txikiagoko eta erantzukizun partekatu handiagoko jaietan aurrera eginez. Horrekin batera, ekimenak osagai solidarioa ere izango du, edalontzi berrerabilgarrien erabiltzaileei gordailu euro bat Lakua Kirol Klubari dohaintzan emateko aukera emanez, egoera ekonomiko zailak arintzeko helburuarekin.
‘Plastikorik ez’ kanpaina hiru printzipio operatiboren gainean eusten da: hondakinen murrizketa, sinpletasun operatiboa eta erantzukidetasun soziala. Ostalaritza sektorea eta herritarrak inplikatuko ditu, aisialdiko testuinguruetan ohitura jasangarriak finkatzeko. Kanpainaren arrakasta funtzionamendu errazean oinarritzen da: edalontzia eskuratzeko euro bat utzi beharko da, eta edalontzi hori nahi adina aldiz trukatu edo itzuli daiteke dirua berreskuratzeko.
Vital Fundazioak edalontziak banatzeko eta jasotzeko bost karpa ezarriko ditu zelaietan, Administrazio Batzarraren Etxearen aurrean, zabu gunean, bolatokiaren aurrean, kontzesionarioen biribilgunean eta Santuaren biribilgunean.
