Gasteizko Udalak 193.000 euro inbertituko ditu Lakua auzoko agorespace gunean
Gasteizko Udaleko Espazio Publikoaren eta Auzoen Sailak Urbabil Dos Mil S.L. enpresari esleitu dizkio Lakua auzoko agorespace gunea berritzeko lanak, 193.187,80 euroan eta egikaritzeko bi hilabeteko epearekin. Auzoko gazteek asko erabiltzen dute Iruñea, Baiona, Wellingtongo Dukea eta Lizarra kaleen arteko parkean dagoen kirolgunea.
Proiektuaren bidez, futbol zelaiko soropil artifiziala ordeztu eta ate berriak jarriko dira, baita egurrezko elementuak konpondu ere, hala nola barandak, oholtzak eta inguruko eserlekuak. Zoladurak eta hiri altzariak hobetuko dira, kirol instalazioa erabat eguneratzeko.
Beatriz Artolazabal Espazio Publikoaren eta Auzoen zinegotziak nabarmendu duenez, “Lakuako agorespace auzoko familiek eta gazteek asko erabiltzen duten tokia da, eta jarduketa honekin, haien segurtasuna, erosotasuna eta irudia hobetuko ditugu“. Halaber, Gasteizko Udaleko gobernu batzordeak Europa Jauregiko erabilera anitzeko areto berriaren lanak esleitu ditu beharrezko eduki eta zerbitzuak handitzeko, 559.631,80 euroko inbertsioa eginez.
