Lau blokeak narriadura egoera aurreratuan daude, eta, beraz, esku hartzearen bitartez, egungoak eraitsi eta, ondoren, eraikin berriak eraikiko dira
Gasteizko Udalak gazteentzako alokairu sozialerako lau etxebizitza bloke birgaituko ditu Erdi Aroko Hiriguneko Zapatari kaleko 98 eta 100 zenbakietan eta Hedegile kaleko 127 eta 129. zenbakietan. Birgaitze Integraturako Plan Bereziaren arabera, 14 eta 16 etxebizitza berri artean izango dituzte, eta alokairu babestuko erregimenean aterako dira, higiezinen merkatura sartu ezin diren gazteen eskaerari erantzuteko.
Gaur egun, lau blokeak narriadura egoera aurreratuan daude, eta, beraz, esku hartzearen bitartez, egungoak eraitsi eta, ondoren, eraikin berriak eraikiko dira.
Borja Rodriguez Hirigintza eta Etxebizitza zinegotzi eta 21 Zabalguneko presidenteak eta Rocio Vitero EH Bilduko bozeramaileak prentsaurrekoan azaldu dutenez, EH Bilduk eta PSEk eta EAK osatutako Udal Gobernuak udal etxebizitzen parkea birgaitzeko helburuarekin aurrekontu akordioan adostutako 3.500.000 euroei esker gauzatuko da proiektua.
Rodriguezen arabera, esku hartzea oso garrantzitsua da «Erdi Aroko Hirigunea berreskuratzen jarraitzeko ibilbide luzeko estrategiaren barruan, auzo hori guztion ondarea baita, baina, batez ere, pertsonak bizi diren eta aukerak sortzen jarraitu nahi dugun lekua, kasu honetan eraikin horiek birgaitzearen eta etorkizuneko gazteentzako etxebizitzetara bideratzearen aldeko apustua eginez».
«Hiri berroneratzea bultzatzen jarraitzea da gure konpromisoa, bizi kalitatearen, jasangarritasunaren eta gizarte kohesioaren hobekuntza ondarearen babesarekin konbinatzeko», gaineratu du.
Bestalde, Viterok azaldu duenez, «esku hartze honen bidez, EH Bilduk 20 urte enkistatuta zeramatzan egoera bat desblokeatzen du, hau da, BEPBn jasotako etxebizitza bloke berri bat eraistea eta eraikitzea. Proiektu hau antzeko ezaugarriak dituen Barnekale Berria kalean bultzatutako proiektuari batzen zaio, guztira, Alde Zaharrean, 24 etxebizitza berri gehitzeko».
«Erakunde publikoen erantzukizuna da etxebizitzarako eskubidea bermatzea eta eskura ditugun tresnak martxan jartzea. Kasu honetan, gainera, Alde Zaharra bizitzeko auzo bat izan dadila bultzatzen dugu, eta ez soilik dekoratu artifizial bat, eta, gainera, etxebizitza horiek gazteentzako alokairu babestura bideratzen ditugu», nabarmendu du.
Esku hartzea bat dator Birgaitze Integraturako Plan Bereziaren helburuekin, Gasteizko gunerik historikoena lehengoratzeari eta zaintzeari dagokionez. Izan ere, eraikinetan ez ezik, esku hartzeak ingurunean ere izango du eragina, Ospitaleen Etxartea bigaitzeko eta ibilgarri egiteko modukoa izateko atea irekiko bailuke, horma batzuk kenduz eta desnibelak gaindituz.
