Patricia Alvarez de Arkaia, Angel Cordero eta Montx Alkortak bultzatutako ekimena da erakusketa, Ignacio Aldecoa Kultur Etxearekin lankidetzan. Irailean inauguratuko da, eta bi hilabetez bisitatu ahal izango da
Gasteizko Foru plazari eskainitako erakusketa bat izango da ikusgai irailaren erdialdetik Ignacio Aldecoa Kultur Etxean, bere sorreraren 50. urteurrena dela eta. Foru plaza hiriburuko «esku hartze berezi eta adierazgarrienetako bat da», eta erakusketa bi hilabete egongo da zabalik, Arabako Foru Aldunditik nabarmendu dutenez.
Erakusketak ibilbidea proposatuko du espazioaren jatorrian, esanahian eta bilakaeran zehar. Plaza 1976an sortu zen, artea, arkitektura eta espazio publikoa fusionatzen dituen herritarren topagune gisa. Eduardo Chillida eskultorearen eta Luis Peña Ganchegui arkitektoaren arteko lankidetzaren emaitza da, eta «plaza eta monumentu kategoria tradizionalak gainditzen dituen obra paregabe gisa finkatu da».
Hainbat azalpen edukiren bidez, Foru plaza sortu zen testuinguru historikoan sakondu ahal izango du publikoak, bai eta hirian hirigintza ulertzeko moduan mugarri izan zen esku hartze bat eragin zuen sormen prozesuan ere.
Erakusketaren elementu nabarmenetako bat izango da, lehen aldiz, gela berean elkartzea Eduardo Chillidak Gasteizekin lotuta egindako lan enblematiko batzuk eta Peña Gancheguik egindako planoen ikuspegiak. Gaur egun, Bilboko Arte Ederren Museoko ‘Gasteiz’ alabastroa edo Arabako Foru Aldundiaren jabetzakoa den ‘Gasteiz’ grabatua erakusteko lanak egiten ari dira, publikoaren gozagarri izango direlakoan. «Piezen elkartze hori une gogoangarria izango da plazaren 50 urteko historian, eta erakusketaren balio bikaina indartuko du», adierazi dute.
Erakusketak plazaren dimentsio artistikoa zein izaera sinbolikoa nabarmenduko ditu, bai eta bizikidetza espazio gisa eta nortasun kolektiboaren isla gisa duen eginkizuna ere. Ildo horretan, arabarren ondare komuna dela eta arte publiko garaikidearen barruan duen garrantzia azpimarratuko da.
Era berean, erakusketak arte, arkitektura eta ondare adituen ikuspuntua jasotzen du. Adituok Foru plazaren gaur egungo esanahiari eta indarraldiari buruzko ikuspegi desberdinak ematen dituzte.
Ekimen horren bidez lortu nahi da gizarteak aintzatespen handiagoa ematea espazio horri, «Gasteizko kultura paisaiaren elementu nagusi gisa duen balioa nabarmen azalduz eta hiria artearen bidez eta herritarren ekimenez eraikitzeko jokabide baten erreferente gisa«.
Patricia Alvarez de Arkaia, Angel Cordero eta Montx Alkortak bultzatutako ekimena da erakusketa, Ignacio Aldecoa Kultur Etxearekin lankidetzan. Irailean inauguratuko da, eta bi hilabetez bisitatu ahal izango da.
