Zirkulazio gaitasuna handitu eta segurtasuna hobetzea dira AP-1 eta A-1 errepideak lotzen dituen azpiegituraren bigarren fasearen helburu nagusiak
Armiñongo lotunea Arabako eta Euskadiko bide sareko puntu estrategikoenetako bat da, eta egunero milaka ibilgailuren joan-etorria hartzen du. Azpiegitura handitzeko lanek trafikoaren arintasuna eta segurtasuna hobetzea dute xede, gaitasun handiagoko lotune bat egokituz etorkizuneko mugikortasun beharrei erantzuteko.
Hala, Arabako Foru Aldundiko gobernu kontseiluak Armiñongo lotunea handitzeko bigarren faseko obren lizitazioa onartu du, 23.291.244 euroko oinarrizko aurrekontuarekin (BEZa barne), eta 30 hilabeteko egikaritze epearekin. Foru erakundeak joan den apirilean lizitatu zuen proiektua, baina orduan esleitu gabe geratu zen, lehiaketa Irango gerrako materialen kostuak asko igotzearekin batera gertatu baitzen.
Arabako Aldunditik jakinarazi dutenez, Armiñongo lotunea handitzeko bigarren fasean, bi erreitik hirura igaroko da AP-1ek eta A-1ek Gasteizerako noranzkoan bat egiten duten gunea, eta trazadura hobetuko da, zirkulazio gaitasuna handitzeko eta segurtasuna indartzeko. Aurreikusitako egutegiaren arabera, obrak urtea amaitu baino lehen hasiko dira eta elkargune berria 2029an egongo da martxan.
Proiektuak AP-1en enborra bi erreitik hirura handitzea aurreikusten du, Gasteiz/Irun noranzkoan, 1.500 metroko tarte batean. Horretarako, Armiñongo lotunearen ekialdeko biribilgunearen gainean dauden bi zubiak aldatuko dira, AP-1en azken zatiaren trazadura indarrean dagoen araudira egokituko da, eta bihurgunea eta kontrabihurgunea ezabatuko dira lehengo ordainlekuko zabaltzan. Gainera, AP-1 eta A-1 errepideek bat egiten duten tokia hobetuko da, bost erreitik hirura murriztuz 1.500 metroan zehar.
Obrak gauzatzean Armiñongo lotunea handitzeko proiektua amaituko da. Lehenengo fasea 2024an eta 2025ean egin zen, eta 2025eko ekainean inauguratu, bost milioi euroko inbertsioa egin ondoren. Lehenengo fasean, errei batetik bira handitu zen A-1en eta AP-1en arteko lotura, Burgos/Madrilerako noranzkoan, Aste Santuan eta udako oporretan sortzen ziren auto ilarak konpontzeko.
Armiñongo lotunea handitzeko bigarren fasearen kostu osoa Espainiako Gobernuak finantzatuko du, lehenengo fasearekin egin zen bezala, Mugikortasun Jasangarriaren eta Bide Azpiegituren Sailak eta Garraio eta Mugikortasun Jasangarriaren Ministerioak 2022an sinatutako hitzarmenaren arabera.
